labees_infrabooster_practitioner

Лабораторијата за бихејвиористички и експериментални економски науки (LaBEES) претставува прв истражувачки капацитет од ваков вид во Западен Балкан, основан со цел систематско проучување на човечкото однесување и донесување на одлуки во економски контексти. Фокусот на лабораторијата е насочен кон земјоделска економија, однесувањето на потрошувачите и дизајнирање на јавни политики засновани на емпириски докази.

LaBEES е опремена со 11 компјутерски станици кои функционираат преку специјализираниот софтвер zTree, а управувањето со регрутацијата на учесници се врши преку системот ORSEE. Во наредниот период се предвидува проширување на капацитетите со дополнителна опрема и биометриска технологија за напредни бихејвиористички истражувања.
Преку контролирани лабораториски и теренски експерименти, лабораторијата генерира научни сознанија за процесот на одлучување кај земјоделците, потрошувачите и креаторите на јавни политики. Истражувањата се базираат на напредни алатки како што се Qualtrics, oTree и Stata, обезбедувајќи висококвалитетна анализа на податоци.

LaBEES воспостави стратешка соработка со реномирани лаборатории, како што се оние во Атина, Загреб и Тексас A&M Универзитетот, како и со релевантни институции, агробизниси и носители на одлуки во земјата. Лабораторијата претставува академска и иновациска платформа за интердисциплинарни истражувања, обука на студенти и развој на политики засновани на наука и податоци.

Во академската 2023/2024 година, тим од Универзитетот „Св. Кирил и Методиј“ во Скопје, Факултет за земјоделски науки и храна – Скопје, учествуваше во целосниот циклус на програмата EIT InfraBooster, финансирана од Европскиот институт за иновации и технологии (EIT). Програмата се базираше на сеопфатна методологија развиена од Универзитетот во Варшава и беше збогатена преку трансфер на знаење и менторска поддршка од Универзитетот во Варшава во соработка со заедниците на EIT.

Како резултат на ова учество, беше дизајнирана, развиена и успешно претставена на пазарот нова услуга: „ Експериментална анализа на потрошувачите за научно поткрепени деловни стратегии“.

Лабораторијата за бихејвиористички и експериментални економски науки – LaBEES им помага на компаниите да разберат што навистина вреднуваат потрошувачите – преку примена на експерименти со реални стимулации, во замена на хипотетички анкети. Како прва лабораторија за експериментална економија во Западен Балкан, базирана на Факултетот за земјоделски науки и храна во Скопје, LaBEES е специјализирана за истражување на потрошувачки преференции поврзани со карактеристики на производи, одржливост и ценовна сензитивност. Услугата овозможува тестирање на нови производи или прототипови, мерење на подготвеноста за плаќање и усовршување на стратегии за цени и маркетинг. Преку симулирање на реални одлуки за купување, LaBEES обезбедува сигурни, применливи и прилагодени сознанија за вашите пазари. Идеална за компании од земјоделако-прехранбениот сектор, трговијата и иновацискиот екосистем, оваа услуга ги намалува ризиците, поддржува подобро одлучување и ја зајакнува конкурентската предност, со поддршка од експертски академски тим и напредна истражувачка инфраструктура.

Ангажманот на нашиот тим вклучуваше:

• Учество во Foundation модулот на EIT InfraBooster, со што се продлабочи знаењето за потенцијалот на истражувачката инфраструктура (RI) и се развија аналитички вештини за нејзина проценка и комерцијална примена;
• Учество во Practitioner модулот на EIT InfraBooster, кој поддржа дизајн на нова услуга преку систематски пристап за искористување на RI во научни институции. Активностите опфатија анализа на уникатните капацитети на инфраструктурата, идентификување индустриски партнери, иницирање контакти со компании, подготвување и усовршување на маркетинг материјали со јасно истакнати предности за клиентите, идентификување на потенцијални клиенти и иницирање на продажен процес. Овие активности беа водени преку индивидуален и тимски менторинг од Универзитетот во Варшава и кулминираа со презентација на концептот на услугата на завршниот настан InfraBooster Demoday. Вредносната понуда на новата услуга беше исто така вклучена во официјалниот каталог на услуги на EIT InfraBooster: https://heyzine.com/flip-book/ba48e1f379.html#page/23