Институт за храна

Во рамките на Институтот функционираат повеќе специјализирани лаборатории опремени за физичко-хемиски, инструментални, ботанички, микробиолошки и сензорни анализи на храната. Во нив студентите од прв циклус студии изведуваат практична настава и стекнуваат вештини за современи аналитички методи, а студентите од втор и трет циклус спроведуваат научно-истражувачка работа во областа на квалитетот и безбедноста на храната.

Институтот учествува во национални и меѓународни истражувачки проекти. Резултатите се презентираат на меѓународни научни собири и се објавуваат во реномирани научни списанија. Меѓународната соработка овозможува и студиски престои и мобилност на наставниот кадар и студентите, со што се унапредуваат нивните компетенции и се зајакнува врската со европскиот истражувачки простор.

Покрај научната и образовната дејност, Институтот соработува со прехранбената индустрија, надлежните институции и други засегнати страни. Таа соработка опфаќа лабораториски анализи, стручни мислења, обуки и поддршка во воведувањето на системи за безбедност и квалитет на храната, во согласност со националната и европската регулатива.