Институт за агроекономика

Институтот за агроекономика е формиран во 1977 година, како Институт за економика и организација во земјоделството, иако економските аспекти во земјоделството биле дел од студиските програми и научноистражувачката работа на факултетот уште од неговото основање. За прв пат институтот воведува своја студиска програма на прв циклус студии „Агроекономика“ во академската 2001/2002 година. Покрај ова, институтот изведува настава на втор циклус студии на студиската програма „Агроекономика и рурален развој“, како и на трет циклус студии, на студиската програма „Агроекономика“. Образовната и истражувачката дејност на институтот е во областа на економика на земјоделството. Ова ги вклучува економските теории и нивната примена во земјоделството и руралниот развој, макро и микро економија, продуктивност и профитабилност на земјоделското производство, агробизнис, агропретприемништво, менаџмент, маркетинг, однесување со потрошувачите, финансии, земјоделска политика и рурален развој. Покрај образовната и научна дејност, институтот учествува и во различни домашни и меѓународни проектни активности, подготовка на национални стратегии, програми и легислативи за земјоделството и руралниот развој. Во текот на студиите, студентите развиваат аналитички вештини за решавање на економски проблеми од областа на земјоделското производство и руралниот развој.