Л-07 · Акредитирана лабораторија
Лабораторија за хемиска анализа на примарни земјоделски производи и нивни преработки
Лабораторијата за хемиска анализа на примарни земјоделски производи и нивни преработки (Л-07) функционира во рамките на Факултетот за земјоделски науки и храна – Скопје, при Универзитетот „Св. Кирил и Методиј“ во Скопје. Нејзините активности опфаќаат хемиски анализи за оценување на квалитетот и безбедноста на храната, разработка и валидација на аналитички методи, како и научноистражувачка, апликативна и образовна дејност.
- Институт
- Институт за храна
- Област
- Храна и пијалоци
Лабораторијата поседува сертификат за акредитација, издаден од Институтот за акредитација на Република Северна Македонија, согласно со барањата на стандардот МКС EN ISO/IEC 17025:2018. Акредитираните методи опфаќаат определување на адитиви (ацесулфам К, натриум сахарин, аспартам, кофеин, натриум бензоат и калиум сорбат) во безалкохолни пијалаци и други прехранбени производи, како и определување на метанол и други виши алкохоли во алкохолни пијалаци.
Други хемиски анализи
Покрај акредитираните методи, во лабораторијата се изведуваат и други хемиски анализи кои имаат придонес во одредување на квалитетот и безбедноста на храната, како што се:
- Основни физичко-хемиски параметри значајни за квалитетот на прехранбените производи
- Определување на различни хемиски компоненти, особено биоактивни компоненти во земјоделски производи и нивни преработки
- Определување на остатоци од пестициди во примероци од овошје, зеленчук и вода и др.
Настава и услуги
Во лабораторијата се реализира практична настава за студентите од прв, втор и трет циклус студии, како и истражувања во рамките на дипломски, магистерски и докторски трудови. Лабораториската инфраструктура е достапна и за научноистражувачки и апликативни активности на истражувачи од Факултетот и од други институции.
Аналитичките услуги на лабораторијата се од значење за производителите на земјоделски и прехранбени производи, особено на безалкохолни и алкохолни пијалаци, инспекциските органи, научноистражувачката и академската заедница, како и потрошувачите.
Фотографии
Опрема
Лабораторијата располага со современа аналитичка опрема, вклучувајќи:
- Течен хроматограф (HPLC)
- Гасен хроматограф (GC)
- Ротоевапоратор
- Аналитичка вага
- pH-метар
- Центрифуга
- Ултразвучна бања
- Магнетна мешалка
- Електронска пипета и друга придружна опрема