Институт за животна средина

Наставно-истражувачките активности опфаќаат широк спектар на дисциплини поврзани со проучувањето на почвата и водата, вклучувајќи формирање, генеза, еволуција, класификација, морфологија, физиологија и својства на почвата, микробиологија и плодност на почвата, исхрана на растенијата и управување со ѓубрива, наводнувањето на земјоделските култури, ефикасното користење на водните ресурси и примената на напредни технологии за наводнување, вклучително системи „капка по капка“, фертиригација, хемигација и прецизно управување со наводнувањето базирано на мониторинг на почвената влага, конзервацијата на почвата и водата, мелиорациите, контролата на ерозијата, проектирањето, експлоатацијата и управувањето со хидромелиоративни системи, како и во истражувањата поврзани со загадувањето и деградацијата на почвите. Посебно внимание се посветува на климатските промени и мерките за адаптација и ублажување на нивните последици врз земјоделството, преку развој и промоција на практики на климатски паметно земјоделство.

Во последните години, значителен дел од активностите е насочен кон примена на дигитални технологии и иновативни решенија за управување со природните ресурси, вклучувајќи географски информациски системи (ГИС), далечинска детекција, беспилотни летала, сензорски технологии и системи за поддршка на одлучувањето. Овие алатки придонесуваат за развој на прецизно и климатски отпорно земјоделство преку поефикасно користење на водата, почвата и другите ресурси, зголемување на продуктивноста и намалување на негативните влијанија врз животната средина.