Лабораторија за анализа на храна за животни

Основната мисија на лабораторијата е поддршка на наставно-образовниот процес за студентите од прв, втор и трет циклус на студии. Покрај тоа, лабораторијата активно придонесува кон научноистражувачката дејност преку учество во национални и меѓународни истражувачки проекти, истовремено развивајќи соработка со стопанството и обезбедувајќи применети услуги за клиенти од приватниот сектор, државни институции, невладини организации, земјоделци, здруженија на производители и други заинтересирани страни.

Лабораторијата е вклучена и во решавање на предизвици поврзани со управувањето со квалитетот и безбедноста во системите за анимално производство, вклучително и специфични испитувања и анализи кои се спроведуваат на сточарски фарми и во објекти за производство на добиточна храна.

Активностите се насочени кон процена и унапредување на квалитетот и безбедноста на добиточната храна, како и нејзината усогласеност со релевантните регулаторни барања и стандарди во секторот, со што лабораторијата придонесува кон одржливо и ефикасно сточарско производство.