Лабораторија за биологија и селекција на медоносни пчели

Научноистражувачките и стручните активности се насочени кон зачувување на биолошката разновидност, унапредување на пчеларските технологии и развој и спроведување на одгледувачки и селекциски програми. Во рамките на овие активности се применуваат и морфометриски, генетски и етолошки анализи, се одредува нивото на инвадираност со ектопаразити кај медоносните пчели, се врши процена на одгледувачките вредности, инструментално осеменување и економски анализи на пчеларското производство. Капацитетите на Лабораторијата се користат и за долгорочно следење и анализа на загубите на пчелните семејства, како и за спроведување на домашни и меѓународни научноистражувачки и развојни проекти.

Лабораторијата располага со современа лабораториска и нагледна опрема, наменета за реализација на научноистражувачки, стручни и наставно-образовни активности. Во нејзините рамки се одржуваат и два пчеларника со вкупен капацитет од 40 пчелни семејства, кои се користат за научни и применети истражувања, практична настава и стручна обука. Лабораторијата располага и со изолирана оплодна станица. Во состав на Лабораторијата се наоѓа и Паркот на пчелата на површина од 600 м², кој претставува едукативен и демонстративен простор наменет за унапредување на знаењата и подигнување на јавната свест за биологијата, значењето и заштитата на медоносните пчели и другите опрашувачи.

Лабораторијата има значајна улога и во наставно-образовната дејност. Таа обезбедува практична и научноистражувачка едукација на студенти од сите циклуси на студии, организира основни и напредни обуки за пчелари и други стручни лица и придонесува кон создавање и објавување научна, стручна и едукативна литература од областа на пчеларството и биологијата на медоносните пчели.