Лабораторија за дигитално земјоделство

За реализација на своите активности, лабораторијата располага со современа истражувачка и наставна инфраструктура која вклучува 10 компјутерски работни места опремени со специјализирани ГИС и софтверски пакети за анализа и обработка на просторни и агрономски податоци, 3Д принтери за развој и прототипирање на технички решенија, како и интерактивна смарт (board) табла за наставни и презентациски активности. Дополнително, лабораторијата располага со беспилотни летала (дронови) опремени со термални и мултиспектрални камери, како и софтверски решенија за обработка и анализа на податоци од далечинска детекција и прецизно мапирање на земјоделските површини.

Во рамките на лабораторијата се воспоставени системи за мониторинг и управување со земјоделското производство кои опфаќаат различни типови автоматски метеоролошки станици со различни видови на сензори за различна намена, почвени сензори за следење на влагата, сензори за влажност со дата-логери развиени во рамките на лабораторијата, сензори за следење на pH и електрична спроводливост (EC), CRNS сензори за процена на почвената влага на ниво на големи површини, како и ET (евапотранспирациски) сензори за поддршка на управувањето со наводнувањето. Лабораторијата исто така располага со различни контролери, автоматски водомери, електромагнетни вентили и контролни единици за автоматизирано управување со системите за наводнување и фертигација.

Во областа на обновливите извори на енергија и одржливото користење на водните ресурси, лабораторијата е опремена со соларни панели, инвертери и пумпни системи за црпење и дистрибуција на вода, кои служат како платформа за истражувања и демонстрација на енергетски ефикасни решенија во земјоделството.

Практичната и демонстративната работа се реализира заедно со Лабораторијата за води, наводнување и фертигација на опитен пластеник, како и преку опитни и демонстративни површини со различни земјоделски култури, на кои се тестираат и валидираат современи технологии за прецизно и климатски паметно земјоделство. Овие капацитети овозможуваат спроведување на научни експерименти, студентска практична настава, демонстрација на иновативни решенија и трансфер на знаења кон земјоделските производители, институциите и други заинтересирани страни.

Преку својата инфраструктура и активности, Лабораторијата за дигитално земјоделство претставува современ центар за истражување, едукација и иновации во областа на дигиталната трансформација на земјоделството и одржливото управување со природните ресурси.